โลกนีติปาฬิแปล_๔.๗๙-๙๓ หมวดมิตร

 

๔. มิตฺตกณฺโฑ

 
๗๙.
หิตกาโร ปโร พนฺธุ, พนฺธูปิ อหิโต ปโร;
อหิโต เทหโช พฺยาธิ, หิตํ อรญฺญโมสธํฯ
๘๐.
ปโรกฺเข คุณ-หนฺตารํ, ปจฺจกฺเข ปิยวาทินํ;
วชฺเชยฺย ตาทิสํ มิตฺตํ, วิสกุมฺเภ ยถา มธุํฯ


๘๑.
ธนหีเน จเช มิตฺโต, ปุตฺตทารา สโหทรา;
ธนวนฺตํว เสวนฺติ, ธนํ โลเก มหา สขาฯ
๘๒.
ชาเนยฺย เปเสน ภจฺจํ, พนฺธุํ วาปิ ภยาคเต;
อปฺปกาสุ ตถา มิตฺตํ, ทารญฺจ วิภวกฺขเยฯ
๘๓.
โส พนฺธุ โย หิเต ยุตฺโต, ปิตโร โหนฺติ โปสโก;
ตํ มิตฺตํ ยตฺถ วิสฺสาโส, สา ภริยา จ ยสฺส นิพฺพูติฯ
๘๔.
น วิสฺสเส อวิสฺสตฺตํ, มิตฺตญฺจาปิ น วิสฺสเส;
กทาจิ กุปิโต มิตฺโต, สพฺพํ โทสํ ปกาสเยฯ
๘๕.
สกึ ทุฏฺฐญฺจ โย มิตฺตํ, ปุน สนฺธิตุมิจฺฉติ;
โส มจฺจุํ อุปคณฺหาติ, คพฺภมสฺสตรี ยถาฯ
๘๖.
วเห อมิตฺตํ ขนฺเธน, ยาว กาโล อนาคโต;
ตเมว อาคเต กาเล, เสเล ภินฺเท ฆฏํ อิวฯ
๘๗.
อิณเสโส อคฺคิเสโส, สตฺรุเสโส ตเถว จ;
ปุนปฺปุนํ วิวฑฺฒนฺติ, ตสฺมา เสสํ น การเยฯ
๘๘.
ปทุมํว มุขํ ยสฺส, วาจา จนฺทน สีตลา;
ตาทิสํ โนปเสเวยฺย, หทเย ตุ หลาหลํฯ
๘๙.
น เสเว ผรุสํ สามึ, น จ เสเวยฺย มจฺฉรึ;
ตโต อปคฺคณฺหํ สามึ, เนว นิคฺคหิตํ ตโตฯ
๙๐.
สิงฺคี ปญฺญาส หตฺเถน, วชฺเช สเตน วาชินํ;
หตฺถึ ทนฺติํ สหสฺเสน, เทส จาเคน ทุชฺชนํฯ
๙๑.
กุเทสญฺจ กุมิตฺตญฺจ, กุกุลญฺจ กุพนฺธวํ;
กุทารญฺจ กุทาสญฺจ, ทูรโต ปริวชฺชเยฯ
๙๒.
โรคาตุเร จ ทุพฺภิกฺเข, พฺยสเน สตฺตุ วิคฺคเห;
ราชทฺวาเร สุสาเน จ, เย ติฏฺฐนฺติ สุมิตฺตกาฯ
๙๓.
สีตวาโจ พหุมิตฺโต, ผรุโส อปฺปมิตฺตโก;
อุปมํ เอตฺถ ญาตพฺพา, จนฺท-สูริย-ราชูนํฯ

มิตฺตกณฺโฑ นิฏฺฐิโตฯ